Dioqeza e Kosovës

Në dritë, në shpresë, në dashuri.

Dioqeza e Prizren–Prishtinës është qendra shpirtërore e katolikëve në Kosovë, që mbledh rreth vetes besimtarë, famulli, rregulltarë dhe motra murgesha, të përkushtuar ndaj misionit të Krishtit. Ajo ka një histori të pasur që lidhet ngushtë me zhvillimin shpirtëror, kulturor dhe shoqëror të vendit. Në këtë dioqezë ndodhen 24 famulli, ku në shumicën shërbejnë meshtarë dioqezanë, ndërsa në disa të tjera rregulltarë që kontribuojnë me përkushtim në jetën baritore dhe edukimin shpirtëror të besimtarëve. Përmes veprimtarisë së saj, Dioqeza synon të ruajë dhe forcojë unitetin e komunitetit katolik, të mbështesë jetën familjare, arsimin fetar dhe përfshirjen aktive të rinisë në Kishë. Ajo është një vend ku besimi merr formë konkrete përmes sakramenteve, liturgjisë dhe jetës së përditshme të përbashkët, duke ftuar çdo njeri të ecë në dritën e Zotit dhe në dashuri për të afërmin.